((((((أنا جمرة بعز الصيف))))))

أحب الصمت وجنونه
وصمت الصمت وسكونه

وهذي فلسفة حبي
وذا قلبي

أخاف اشكي... واسبب جرح
أخاف اشكي... واكدر فرح

أخاف اشرح... ولا أوفي
ويضيع الحب ويضيع الشرح

حروفي قاصرة جدا
وانا قاصر بفن الطرح والالقاء

معك انت
أجر المبتدأوانصب واضم الياء

أنا خريج كلية أصول الحب

أعرف الجرح من نظرة... واعرف الطب

ولكن علتي التعبير
أحس اني صغير بالتعبير
والتفسير والتصوير
واحس ان الحروف اقزام
أمام الشوق والالهام

واشوف ان الكلام يضيع
مثل ذرة بكون وسيع

اذا ماشفت محبوبي
بعد عمري..بعدقلبي..بعد شوفي

ترى في الصمت آلاف اللغات تعيش
وبوسط اللغات حروف
تطير بلا جناح وريش

تغرد والنظر يسمع
تقول لين الفجر يطلع
بلا تمثيل... وبلا تضليل
تترجم حالة الاحساس...بلا احساس
تغني........
انت اعز الناس..واغلى الناس..

حديث الصمت
ياعذبه حديث الصمت
بين عيوني وعيونك
بين فتوني وفتونك

يخلي نبضك الولهان... يسافر في شراييني
يخلي قلبك الشفقان... بلا صوت..يناديني

حديث الصمت
به تعلمت
وشلون انا أحسب... مساحات العمر كله... وافكك لغزك المدفون واحله

اباكتب ألف قاموس... يضم اول حروف اسمك
وباصنع ألف ناقوس... يدق آخر حروف اسمك

ترى حبك وكل الحب
قطرة من بحر حبي

ترى عدلي وكل العدل
ثواني من زمن ظلمك

أنا ما اقول اني أحبك...
قديـــــمه...أحبك
يتيــــــمه...أحبك
سخيفه مالها معنى ولا مضمون
سخيفه مثل شمعة بشمس الكون

تجاوزت الهوى والحب
أنا في مرحلة لاحب
تفوق الحب.. تفوق الوصف والتشبيه

أنا حبي تعدى الحد
أنا جمرة بعز الصيف